Disney va Pixar studiyasining yangi animatsion filmi “Hoppers” kinoprokatda kutilganidan ham katta muvaffaqiyatga erishdi. Multfilm namoyishining ilk dam olish kunlaridayoq dunyo bo‘ylab 88 million dollar daromad to‘pladi.
Shundan 46 million dollari AQSH va Kanada kinoteatrlaridan, qolgan qismi esa xalqaro bozordan tushgan. Bu natija Pixar uchun so‘nggi yillarda erishilgan eng yaxshi boshlanishlardan biri bo‘ldi.
Mutaxassislarning ta’kidlashicha, “Hoppers” shu orqali 2017 yilda chiqqan “Coco”dan beri original Pixar multfilmlari orasida eng muvaffaqiyatli startni qayd etdi.
Tanqidchilar ham multfilmni iliq kutib oldi. Film Rotten Tomatoes platformasida yuqori baho oldi, tomoshabinlar esa uni CinemaScore reytingida “A” darajasi bilan baholadi.
“Hoppers” syujeti tabiatni himoya qilish g‘oyasiga asoslangan bo‘lib, unda bosh qahramon o‘rmon hayvonlarini qutqarish uchun g‘aroyib sarguzashtlarga duch keladi. Film hazil, sarguzasht va ekologik mavzularni uyg‘unlashtirgani bilan tomoshabinlar e’tiborini tortmoqda.
Mutaxassislar fikricha, ushbu muvaffaqiyat Pixar studiyasi uchun muhim burilish bo‘lishi mumkin. Chunki so‘nggi yillarda kompaniyaning ayrim loyihalari kutilgan darajada daromad keltirmagandi. Endilikda “Hoppers” studiyaning yana bir yirik hitiga aylanishi mumkin.
