O‘zbek xonandasi Dilnoz Hakimova shaxsiy hayoti, turmush o‘rtog‘i qo‘ygan cheklovlar va o‘ziga xos qiziqishlari haqida ochiq intervyu berdi.
San’atkorning aytishicha, turmushga chiqqanidan keyin uning hayotida keskin o‘zgarishlar bo‘lmagan. U alohida uyda yashagani sababli an’anaviy kelinlik majburiyatlari — ertalabdan uy yumushlari bilan band bo‘lish kabi holatlarga duch kelmaganini ta’kidlaydi.
“Ba’zi joylarga borishim taqiqlangan”
Xonanda intervyuda turmush o‘rtog‘i tomonidan qo‘yilgan ayrim cheklovlar haqida ham gapirdi. Unga ko‘ra, u erkak muxlislar bilan suratga tushmaydi — bu erining talabi.
Bundan tashqari, do‘stlari bilan restoran yoki kafelarga borishi ham cheklangan:
“Hammasini aytsam, erimni abyuzer deb o‘ylashingiz mumkin”, — deydi u.
San’atkorning so‘zlariga ko‘ra, turmushdan oldin bu borada ancha erkin bo‘lgan, hozir esa do‘stlari bilan uchrashuvlar ko‘proq uning uyida o‘tadi.
Ijodiga ham ta’siri bor
Dilnoz Hakimova aytishicha, bu cheklovlar uning ijodiga ham qisman ta’sir qilgan. Jumladan, u qo‘shiqlarining kliplarida syujetli rollarda ham deyarli ishtirok etmaydi — bu ham turmush o‘rtog‘i tomonidan qo‘yilgan talablar sirasiga kiradi.
Shu bilan birga, xonanda turmush o‘rtog‘i haqida ijobiy fikr bildirgan va uni “yaxshi inson” deb ta’riflagan.
Noyob qiziqishi haqida
Intervyu davomida u o‘zining noodatiy qiziqishi — narda o‘yiniga bo‘lgan mehrini ham yashirmadi. Xonanda bu o‘yinni nafaqat yaxshi ko‘rishini, balki ancha yaxshi o‘ynashini ham aytadi.
“Yutishning yarmi — taktika, qolgan yarmi — omad”, — deya izoh beradi u.
Agar ayollar o‘rtasida musobaqa bo‘lsa, unda mamnuniyat bilan qatnashishini ham qo‘shimcha qilgan.
