Amerikalik reper Kanye West (Ye) Turkiyaning Istanbul shahrida bergan konserti bilan musiqa tarixiga kirishga muvaffaq bo‘ldi. Ataturk Olimpiya stadionida bo‘lib o‘tgan shouga 118 ming tomoshabin tashrif buyurgani ma’lum qilindi. Bu ko‘rsatkich eng ko‘p tomoshabin yig‘gan pullik stadion konsertlaridan biri sifatida qayd etilmoqda.
Istanbuldagi chiqish reperning 2014-yildan buyon Yevropadagi ilk yirik konserti bo‘ldi. Shou 30-may kuni bo‘lib o‘tgan va qariyb ikki soat davom etgan. Tadbir uchun maxsus sahna, 360 darajali ovoz tizimi, lazer shoulari va dron namoyishlari tayyorlangan.
Tashkilotchilar ma’lumotiga ko‘ra, konsertni tomosha qilish uchun nafaqat Turkiyadan, balki Buyuk Britaniya, Germaniya, Fransiya, Niderlandiya, Italiya, Polsha, Rossiya va Yaqin Sharq davlatlaridan ham muxlislar kelgan. Stadion tadbir boshlanishidan bir necha soat oldin deyarli to‘lib bo‘lgan.
Konsert davomida Kanye Uest tomoshabinlarga murojaat qilib, 118 ming kishi bilan stadion konsertlari bo‘yicha rekord o‘rnatilganini aytgan.
Uning so‘zlariga ko‘ra, bu tarixdagi eng katta pullik stadion chiqishlaridan biri hisoblanadi. Mazkur ma’lumot keyinchalik bir qator xalqaro nashrlar tomonidan ham yoritildi.
So‘nggi yillarda Kanye Uest bir qator bahsli bayonotlari sabab ayrim davlatlarda tanqid ostida qolgan. Shunga qaramay, Istanbuldagi konsert uning ijodiga qiziqish hali ham yuqori ekanini ko‘rsatdi. Ayrim Yevropa mamlakatlarida uning rejalashtirilgan chiqishlari bekor qilingan bo‘lsa-da, Turkiyadagi shou rekord darajadagi auditoriyani jamladi.
