Krossovka kiyish uchun egilish, bog‘ichlarni yechish yoki qo‘llardan foydalanish shart emas. Nike bir necha yil avval aynan shu g‘oyaga asoslangan Go FlyEase modelini taqdim etgan. Maxsus mexanizmi tufayli oyoq kiyimni qo‘l bilan ushlamasdan kiyish va yechish mumkin.
Krossovka qanday ishlaydi?
Nike Go FlyEase odatiy krossovkalardan farqli ravishda maxsus bukiluvchi konstruksiyaga ega. Uning asosiy qismlari — elastik taranglagich va ikki holatda mahkamlanadigan maxsus sharnir mexanizmi.
Krossovka kiyilmagan paytda uning orqa qismi yuqoriga ko‘tarilgan holda turadi. Foydalanuvchi oyog‘ini ichiga joylashtirib, oyoq bilan taglikka bosadi. Shundan so‘ng konstruksiya yopilib, krossovka odatiy shaklga keladi va oyoqda mahkam turadi.
Yechish ham xuddi shunday oddiy. Oyoqning ikkinchi qismi yordamida krossovkaning orqa tomonidagi maxsus tayanch bosiladi va oyoq kiyim ochilib, oyoqdan osongina chiqadi.
G‘oya kimlar uchun yaratilgan?
Go FlyEase konsepsiyasi nafaqat qulaylik, balki inklyuziv dizayn tamoyiliga ham asoslangan. Nike bu yo‘nalishda harakatlanish imkoniyati cheklangan insonlar uchun krossovkani mustaqil kiyish va yechishni osonlashtirishni maqsad qilgan.
FlyEase liniyasining rivojlanishiga 2012-yilda Nike kompaniyasiga murojaat qilgan Metyu Uolzer ismli o‘smir ham turtki bergan. U serebral falaj bilan tug‘ilgan bo‘lib, mustaqil kiyinishga intilgani, biroq poyabzal bog‘ichlarini bog‘lashda yordamga muhtojligini kompaniyaga yozgan. Keyinchalik uning murojaati FlyEase konsepsiyasini rivojlantirishga ta’sir ko‘rsatgan.
Oddiy slip-on emas
Go FlyEase’ni oddiy oyoq kiyimdan farqlaydigan asosiy jihat — u shunchaki keng yoki elastik qilib ishlab chiqilmagan. Krossovkaning konstruksiyasi foydalanuvchining oyoq harakatini hisobga olgan holda ishlab chiqilgan.
Nike muhandislari odatda odamlar qo‘l ishlatmasdan krossovka kiyishda bajaradigan harakatlarni kuzatgan. Natijada bu jarayonni maxsus mexanizm yordamida takrorlaydigan konstruksiya yaratilgan.
Shu sababli model nafaqat nogironligi bo‘lgan insonlar, balki tezda kiyinishni istaydigan, qo‘llari band bo‘ladigan yoki shunchaki qulaylikni afzal ko‘radigan foydalanuvchilar uchun ham qiziq yechimga aylangan.
Texnologiya kundalik hayotga moslashtirilmoqda
Nike Go FlyEase dastlab 2021-yilda taqdim etilgan va kompaniyaning hands-free, ya’ni qo‘l ishlatmasdan foydalaniladigan poyabzal yo‘nalishidagi muhim modellaridan biri bo‘lgan. Dastlabki modelning narxi 120 dollar etib belgilangan, sotuv esa cheklangan miqdorda boshlangan.
Bugun bu g‘oya poyabzal dizaynida tobora keng tarqalmoqda. Ishlab chiqaruvchilar uchun asosiy maqsad faqat tashqi ko‘rinishni o‘zgartirish emas, balki kundalik foydalanishni iloji boricha sodda va qulay qilishga qaratilmoqda.
Go FlyEase esa shu yo‘nalishdagi eng ko‘zga ko‘ringan loyihalardan biri bo‘lib, oddiy krossovkani ham texnologik mahsulotga aylantirish mumkinligini ko‘rsatdi.
