Amerikalik mashhur aktyor va prodyuser Vin Dizel ijtimoiy tarmoqlarda kutilmagan yangilik bilan o‘rtoqlashdi. Uning ma’lum qilishicha, Saudiya Arabistonining “An-Nassr” klubi hujumchisi Krishtianu Ronaldu “Forsaj” kinofranshizasining yangi filmida suratga tushadi.
“Ko‘pchilik Ronaldu ‘Forsaj’da rol o‘ynaydimi, deb so‘rayotgandi. Shuni ayta olamanki, bu haqiqatan ham amalga oshadi. Biz u uchun maxsus rol yaratdik”, — dedi Vin Dizel o‘zining Instagram sahifasida.
Avvalroq, 2026-yilda “Forsaj 11” filmi ekranlarga chiqishi ma’lum qilingan edi. Ta’kidlanishicha, ushbu qism franshizaning yakuniy filmi bo‘ladi.
Ma’lumot o‘rnida: joriy mavsumda Krishtianu Ronaldu barcha musobaqalar doirasida 12 ta uchrashuvda maydonga tushib, 11 ta gol va 2 ta golli uzatma muallifi bo‘lgan. Futbolchining “An-Nassr” klubi bilan shartnomasi 2027-yil yozigacha amal qiladi.
