“Kinder” shokoladi qadoqlarida yillar davomida tasvirlangan jilmaygan bola ko‘pchilikka yaxshi tanish. U haqida uzoq vaqt davomida turli mish-mishlar va taxminlar yurdi. Ayrimlar o‘zini aynan o‘sha bola deb tanishtirgan bo‘lsa-da, uning asl shaxsi ko‘p yillar sir bo‘lib kelgan.
Ma’lum bo‘lishicha, “Kinder” qadoqlaridagi mashhur bola — italiyalik Matteo Farneti hisoblanadi. U 2004 yilda, 11 yoshida maxsus kasting orqali tanlab olingan va uning surati mashhur shokolad brendi qadoqlarida 15 yil davomida foydalanilgan.
Yillar davomida turli shaxslar — jumladan britaniyalik model Josh Bateson va italiyalik teleboshlovchi Alessandro Egger o‘zini “Kinder bolasi” deb e’lon qilgan. Biroq keyinchalik bu da’volarning asossiz ekani ma’lum bo‘ldi.
2019 yilda “Ferrero” kompaniyasi bilan tuzilgan shartnoma muddati tugagach, Matteo Farneti ilk bor ochiq ravishda aynan u qadoqlardagi bola ekanini tasdiqladi. 2024 yilda esa u rasmiy hujjatlar orqali bu faktni isbotlab berdi.
Bugungi kunda Matteo Farneti 30 yoshdan oshgan. U model va aktyor sifatida faoliyat yuritadi, reklama loyihalarida ishtirok etadi hamda turli brendlar bilan hamkorlik qiladi. Ijtimoiy tarmoqlarda u ish jarayonlari, sayohatlari va kundalik hayotidan lavhalarni bo‘lishib boradi.
Matteo o‘sha davrni iliq xotiralar bilan eslaydi va “Kinder” bilan hamkorlik uning hayotida muhim bosqich bo‘lganini ta’kidlaydi.
