Malika Diana halok bo‘lganiga qariyb 30 yil bo‘lsa-da, uning o‘limi atrofidagi savollar hanuzgacha ochiq qolmoqda. Rasmiy xulosalarga ko‘ra, 1997-yilda Parijda yuz bergan avtohalokat tasodif bo‘lgan. Ammo bu versiyaga ishonganlar bilan bir qatorda, bunga shubha bilan qaraydiganlar ham kam emas.
Ayniqsa, misrlik milliarder Muhammad Al-Fayed bu voqeani oddiy baxtsiz hodisa deb hisoblamagan. U o‘g‘li Dodi va Diana o‘limi ortida katta fitna borligiga qat’iy ishongan.
Milliarderning fikricha, Diana va uning o‘g‘li ataylab yo‘q qilingan. U hatto bu ish ortida Britaniya qirollik oilasi turganini da’vo qilgan. Al-Fayedning aytishicha, qirollik vakillari Diananing musulmon erkak — Dodi bilan munosabatlarini qabul qilmagan.
U yana bir shov-shuvli gapni ilgari surgan: go‘yoki Diana homilador bo‘lgan va Dodi bilan turmush qurishni rejalashtirgan. Shu sababli ularning yo‘q qilinishi rejalashtirilgan bo‘lishi mumkinligini aytgan.
Biroq Britaniya va Fransiya tergov organlari bu fikrlarni rad etgan. Ularning xulosasiga ko‘ra, halokatga haydovchining ehtiyotsizligi va paparatsilar ta’qibi sabab bo‘lgan.
Ko‘plab mustaqil tekshiruvlar ham hech qanday fitna izlarini topmagan. Shunga qaramay, bu voqea atrofidagi turli taxminlar va mish-mishlar hanuzgacha davom etmoqda.
Oradan yillar o‘tsa-da, Diana o‘limi haqidagi bahslar tugagani yo‘q. Kimdir buni oddiy fojia desa, boshqalar ortida katta sir yashiringaniga ishonadi.
Bir narsa aniq — “xalq malikasi”ning hayoti ham, o‘limi ham dunyoni hali uzoq vaqt o‘ylantirishda davom etadi.
