Texnika bozori kundan-kunga qimmatlashayotgan bir paytda ko‘pchilik ishlatilgan gadjetlarga qiziqmoqda. Ammo ayrim qurilmalar bor — ular tashqi tomondan ideal ko‘rinsa ham, ichida jiddiy muammolar yashirin bo‘lishi mumkin.
Ayniqsa batareya, sensor va ichki komponentlarga bog‘liq texnikalarda “ikkinchi qo‘l” xarid keyinchalik ortiqcha xarajatga aylanish ehtimoli katta. Quyidagi gadjetlarni esa imkon qadar yangi holatda sotib olish tavsiya etiladi.
Powerbank — xavf eng katta qurilmalardan biri
Powerbank
Tashqaridan oddiy ko‘rinadigan powerbank ichida eskirgan yoki shikastlangan batareya bo‘lishi mumkin. Ishlatilgan qurilmalarda quvvat tez tugashi, qizib ketish yoki umuman ishlamay qolish holatlari ko‘p uchraydi.
Eng xavflisi — sifatsiz yoki eskirgan batareyalar portlash xavfini ham oshiradi.
Aqlli soatlar — batareya tez “o‘ladi”
Aqlli soat
Smartwatch’larda asosiy muammo — batareya. Vaqt o‘tishi bilan u quvvatni juda yomon ushlay boshlaydi. Natijada soatni kun davomida bir necha marta quvvatlashga to‘g‘ri keladi.
Bundan tashqari, sensorlar ham aniq ishlamasligi mumkin. Yurak urishi yoki uyqu monitoringi noto‘g‘ri natija ko‘rsatishi ehtimoli bor.
Simsiz quloqchinlar — xizmat muddati qisqa
Simsiz quloqchin
Wireless quloqchinlar kichik batareya bilan ishlaydi. Shu sabab ular tez eskiradi. Ayniqsa ishlatilgan AirPods yoki boshqa TWS quloqchinlarda bir necha oydan keyin quvvat muammosi boshlanishi mumkin.
Ko‘pincha bitta quloqchin ikkinchisiga qaraganda tezroq ishlamay qoladi.
Noutbuk batareyasi — yashirin muammo
Noutbuk
Ishlatilgan noutbuk yaxshi variant bo‘lishi mumkin, ammo batareyasi eskirgan bo‘lsa, qurilma doimiy ravishda tokka ulanib ishlashga majbur bo‘ladi.
Ba’zi hollarda esa avvalgi foydalanuvchi qurilmani haddan tashqari yuklagani sabab protsessor yoki sovutish tizimi ham zarar ko‘rgan bo‘ladi.
VR ko‘zoynaklar — gigiyena va sensor muammosi
VR ko‘zoynak
Virtual reallik qurilmalari yuz bilan bevosita aloqa qilgani sabab gigiyena masalasi muhim hisoblanadi. Bundan tashqari, sensor va linzalardagi kichik shikast ham foydalanish sifatiga jiddiy ta’sir qiladi.
Ayrim hollarda ekrandagi nuqsonlar uzoq vaqt ishlatganda ko‘z charchashiga olib kelishi mumkin.
Texnikani arzonroq olish har doim ham foydali degani emas. Ayniqsa batareya va sensorlarga bog‘liq qurilmalarda ishlatilgan variant ko‘pincha qisqa muddatli “tejash” bo‘lib chiqadi.
