Multfilmlar faqat bolalar uchun degan fikr allaqachon eskirgan. Ba’zi animatsion filmlar kattalarga ham muhim hayotiy saboqlar beradi, stressni kamaytiradi va ruhiy holatni yaxshilashga yordam beradi. Quyidagi multfilmlar aynan shunday asarlar qatoriga kiradi.
- “Boshqotirma” (Inside Out)
Riley ismli qizaloqning miyasi ichida yashovchi quvonch, g‘amginlik, qo‘rquv, jahl va jirkanish kabi hissiyotlar haqida hikoya qiladi. Multfilm inson his-tuyg‘ularining ahamiyatini tushunishga yordam beradi va har qanday hissiyot kerakli ekanini eslatadi.
2. “Ruh” (Soul)
Musiqachi bo‘lishni orzu qilgan Jo Gardner kutilmaganda o‘zini boshqa olamda topadi. U yerda u hayotning asl ma’nosi nimada ekanini anglay boshlaydi. Multfilm tomoshabinga baxt katta yutuqlarda emas, balki oddiy lahzalarda yashiringanini ko‘rsatadi.
3. “Yuqoriga” (Up)
Yolg‘iz qolgan qariya Karl minglab sharlar yordamida uyini osmonga ko‘tarib, umr bo‘yi orzu qilgan sayohatga chiqadi. Bu multfilm yo‘qotishlarni qabul qilish, yangi hayot boshlash va orzular ortidan borish haqida.
4. “Robot VALL-I” (WALL-E)
Yer yuzida yolg‘iz qolgan kichkina robotning hikoyasi orqali film ekologiya, insoniylik va sevgi mavzularini yoritadi. Deyarli dialogsiz bo‘lishiga qaramay, multfilm juda chuqur ma’no beradi.
5. “Omad” (Luck)
Sem Grinfild o‘zini dunyodagi eng omadsiz qiz deb hisoblaydi. Bir kuni u tasodifan omad va omadsizlik boshqariladigan sirli olamga tushib qoladi. Multfilm hayotdagi har bir muvaffaqiyatsizlik ortida ham yangi imkoniyat yashirinishi mumkinligini ko‘rsatadi. “Omad” tomoshabinga qiyinchiliklarga boshqacha nazar bilan qarashni va hech qachon umidni yo‘qotmaslikni o‘rgatadi.
Ushbu multfilmlar nafaqat kayfiyatni ko‘taradi, balki hayotga boshqacha nazar tashlashga ham yordam beradi. Shuning uchun ular bolalar bilan bir qatorda kattalar uchun ham qiziqarli va foydali hisoblanadi.
