Meksikaning Xalisko shtatida o‘zini jinoyatchilarga qarshi kurashuvchi sifatida tanitgan noma’lum niqobli shaxs ijtimoiy tarmoqlarda “Meksikalik Betmen” nomi bilan mashhur bo‘lib ketdi. U mototsikl o‘g‘irligida gumon qilingan shaxslarni ushlab, skotch bilan chiroq ustunlariga bog‘lab ketayotgani aytilmoqda.
Mahalliy politsiya ma’lumotlariga ko‘ra, ilk shunday holat 13-iyun kuni qayd etilgan. Keyingi o‘n kun ichida esa yana kamida beshta shunga o‘xshash voqea sodir bo‘lgan. Har safar gumonlanuvchilar ustunlarga bog‘langan, yonida esa o‘g‘irlangan bo‘lishi mumkin bo‘lgan mototsikllar qoldirilgan.
Internetda tarqalgan surat va videolarda ayrim gumonlanuvchilarning yuziga mo‘ylov chizilgani, peshonasiga esa ispan tilida “o‘g‘ri” ma’nosini anglatuvchi “ratero” so‘zi yozilgani ko‘rinadi. Shu sababli sirli qasoskor qisqa vaqt ichida ijtimoiy tarmoqlarning eng ko‘p muhokama qilinayotgan qahramonlaridan biriga aylandi.
Huquq-tartibot idoralari noma’lum shaxsni faol qidirmoqda. Inson huquqlari himoyachilari esa bunday o‘zboshimchalik bilan jazo berish xavfli oqibatlarga olib kelishi mumkinligini ta’kidlamoqda. Shunga qaramay, internet foydalanuvchilarining bir qismi uni jinoyatchilikka qarshi kurashayotgan “xalq qahramoni” sifatida qo‘llab-quvvatlamoqda.
