Agar murakkab syujetlar, kutilmagan yakunlar va tomoshabinni oxirigacha hayajonda ushlab turadigan filmlar yoqsa, yaqin orada ekranlarga chiqadigan ushbu detektiv kartinalar aynan siz uchun. Quyidagi filmlar sirli voqealar, jinoyatlar va psixologik jumboqlarga boy syujetlari bilan ajralib turadi.
1. The Good Boy (“Yaxshi bola”)
Yosh yigit sirli oilaning uyiga tushib qoladi va asta-sekin bu xonadon ortida dahshatli sir yashiringanini anglay boshlaydi. Psixologik triller elementlariga boy film tomoshabinni oxirigacha taranglikda ushlab turadi.
2. The Thursday Murder Club (“Payshanba kungi qotillik klubi”)
Richard Osman bestselleri asosida suratga olingan filmda qariyalar uyida yashovchi to‘rt nafar do‘st haqiqiy qotillikni tergov qilishga kirishadi. Hazil va detektiv janrini uyg‘unlashtirgan loyiha yulduzli aktyorlar tarkibi bilan ham e’tiborni tortmoqda.
3. Keeper (“Qo‘riqchi”)
Tinch hayot kechirayotgan oilaning hayoti sirli hodisalar sabab izdan chiqadi. Film davomida voqealar tobora murakkablashib, haqiqat va yolg‘on chegarasi yo‘qola boshlaydi.
4. Relay (“Vositachi”)
Yirik korporatsiyalar sirlarini oshkor qiluvchi vositachi xavfli fitna markaziga tushib qoladi. Jinoyat va keskin syujetni yoqtiradigan tomoshabinlar uchun mo‘ljallangan triller.
5. The Rip (“O‘lja”)
Bir guruh politsiyachi noqonuniy pullarga duch kelgach, o‘zaro ishonch sinovdan o‘tadi. Jinoyat, xiyonat va murakkab tanlovlar filmning asosiy mavzusini tashkil etadi.
6. Wake Up Dead Man: A Knives Out Mystery (“Uyg‘on, o‘lik odam: ‘Pichoqlar orasida’ olamidagi yangi jumboq”)
Mashhur detektiv Benua Blank yana bir murakkab jinoyatni tergov qiladi. “Knives Out” franshizasining yangi qismi yana o‘tkir hazil, kutilmagan burilishlar va jumboqli voqealarni va’da qilmoqda.
