AQShning Ogayo shtatida yashovchi Jenny laqabli ot o‘zining g‘ayrioddiy uzun dumi bilan Ginnesning rekordlar kitobiga kirdi. Uning dumi 412,62 santimetr uzunlikda bo‘lib, bu deyarli Volkswagen Beetle avtomobilining uzunligiga teng.
Rasmiy nomi Mountjoy’s Ice Princess bo‘lgan Jenny — American Saddlebred zotiga mansub. Uning rekord natijasi 2026-yil 25-iyul kuni Ogayo shtatining Spring Valley shahrida tasdiqlangan.
Jenny’ning dumi yetti yil davomida o‘stirilgan. Uning egalari Mackenzie Lowe va Rachel Estes otning dumini kesmaslikka qaror qilgan va vaqt o‘tishi bilan u tobora uzayib borgan.
Yangi rekord avvalgi natijani ham sezilarli darajada yangiladi. 2007-yilda JJS Summer Breeze ismli otning 381 santimetrlik dumi eng uzun hisoblangan edi. Jenny esa bu ko‘rsatkichni 31 santimetrdan ko‘proqqa oshirdi.
Bunday uzun dum chiroyli ko‘rinsa-da, uni parvarish qilish oson emas. Jenny’ning egalari dumini taxminan oyiga bir marta yuvib, quritadi, chigallarini yozadi va maxsus tarzda o‘rib qo‘yadi. To‘liq parvarish jarayoni 4–5 soatgacha davom etadi.
Dumning shikastlanmasligi uchun u maxsus g‘ilofda saqlanadi. Bu Jenny yoki boshqa otlar tasodifan uning uzun dumini bosib yuborishining oldini oladi.
Qiziq tomoni, Jenny kichikligida o‘z dumini butunlay yulib tashlagan. Keyinchalik esa dum yana o‘sib, egalarini rekord o‘rnatishga undagan.
Shu tariqa, oddiy parvarishdan boshlangan jarayon Jenny’ni dunyodagi otlar orasida eng uzun dum egasiga aylantirdi.
