Kino sanoatida tarixiy voqea yuz bermoqda. Ilk bor to‘liq metrajli badiiy filmda bosh qahramon rolini sun’iy intellekt asosida yaratilgan virtual aktrisa ijro etadi. Loyiha kino va AI texnologiyalarini birlashtirgan yangi bosqich sifatida baholanmoqda.
Film syujeti sun’iy intellektning murakkab dunyosida shakllanayotgan virtual qahramonning o‘zligini anglash, his-tuyg‘ularni kashf etishi va insoniyat bilan munosabatlarini izlashiga bag‘ishlangan. Mualliflar bu orqali texnologiya va inson o‘rtasidagi chegaralar tobora noaniq tus olayotganini badiiy usulda yoritishni maqsad qilgan.
Loyiha ijodkorlarining ta’kidlashicha, virtual aktrisa zamonaviy sun’iy intellekt texnologiyalari yordamida yaratilgan bo‘lib, uning yuz ifodalari, ovozi va harakatlari real aktyorlarnikiga maksimal darajada yaqinlashtirilgan. Filmda esa sun’iy intellekt inson aktyorlari bilan bir sahnada to‘laqonli bosh rolni ijro etadi.
Mutaxassislar fikricha, ushbu loyiha kino industriyasida yangi davrni boshlab berishi mumkin. Shu bilan birga, sun’iy intellekt aktyorlari an’anaviy san’atkorlar o‘rnini egallaydimi yoki ular bilan birga ishlaydimi, degan savollar atrofidagi bahslar yanada kuchayishi kutilmoqda.
