Janubiy Koreyada 30 yoshdan oshgan ayol o‘zini mashhur aktyor Li Don Uk deb tanishtirgan shaxs bilan qariyb sakkiz oy davomida yozishib, uni haqiqiy sevgilisi deb o‘ylagan. Keyinchalik bu muloqot firibgarlik sxemasining bir qismi ekani ma’lum bo‘lgan. Ayol jami 35 million von — taxminan 25 ming dollar mablag‘idan ayrilgan.
“Ota-onam bilan tanishtiraman” degan xabarlar
Voqea SBS telekanalining “News Hunters” dasturida yoritilgan. Jabrlanuvchi A ismli ayol Li Don Ukning muxlisi bo‘lgan va qo‘shimcha rollarda suratga tushib ishlagan.
Uning aytishicha, yil boshlarida ijtimoiy tarmoq orqali o‘zini Li Don Uk deb tanishtirgan erkak bilan tanishgan. Ular keyinchalik messenjer orqali muntazam yozishib turgan. Firibgar ayolga aktyorlik faoliyati borasida maslahatlar bergan, shu bilan birga romantik mazmundagi xabarlarni ham yuborgan.
Ayol suhbatlar davomida ular o‘rtasidagi munosabat haqiqiy romantik aloqaga aylanganiga ishongan. Hatto “ota-onalar bilan uchrashish” va tanishuv marosimi haqida ham gaplashilgan.
Biroq eng muhim jihat shundaki, ular sakkiz oy davomida yozishgan bo‘lsa-da, biror marta yuzma-yuz uchrashmagan va telefon orqali gaplashmagan.
Firibgarlik qimmatbaho sovg‘adan boshlangan
Bir muddatdan keyin suhbatdosh ayolga xorijda suratga olish jarayonida ekanini va unga qimmatbaho sovg‘alar yuborganini aytgan.
Firibgarning da’vosiga ko‘ra, posilkada qiymati taxminan 700 million von, ya’ni qariyb 500 ming dollarlik sovg‘alar bo‘lgan. Keyin esa bu posilka bojxonada ushlab qolingani va uni chiqarib olish uchun turli to‘lovlarni amalga oshirish kerakligini bildirgan.
Shundan so‘ng ayoldan bir necha marta pul so‘ralgan. Mablag‘lar go‘yoki bojxona hujjatlarini rasmiylashtirish va saqlash xarajatlari uchun kerakligi aytilgan.
Natijada ayol jamg‘armasini yechib, hatto kundalik xarajatlari uchun mo‘ljallangan pulidan ham foydalanib, jami 35 million von yuborgan.
Nega u firibgarlikni payqamagan?
Firibgar o‘zining mashhur aktyor ekanini tasdiqlash uchun turli suratlar, jumladan selfilar yuborgan. Bundan tashqari, pulni to‘g‘ridan-to‘g‘ri agentlik hisobiga yubormaslikni, buning o‘rniga o‘zi ko‘rsatgan bank hisoblariga o‘tkazishni so‘ragan.
Pul yuborilgan hisoblarning egasi esa har safar turlicha bo‘lgan. Firibgar buni aktyorlik faoliyati va shaxsiy hayotini sir saqlash zarurati bilan izohlagan.
Huquqshunoslar bu holatni romantik firibgarlik — romance scam deb baholagan. Bunday sxemada firibgar avval jabrlanuvchi bilan hissiy aloqa o‘rnatadi, ishonch qozonadi va keyinchalik turli bahonalar bilan pul talab qiladi.
Li Don Ukning agentligi muxlislarni ogohlantirdi
Voqea ortidan Li Don Uk faoliyat yuritadigan King Kong by Starship agentligi ham bayonot berdi.
Agentlikning ta’kidlashicha, kompaniya aktyorlarining shaxsiy messenjer yoki ijtimoiy tarmoq akkauntlari orqali muxlislardan pul, qimmatbaho buyumlar yoki shaxsiy ma’lumotlar talab qilinmaydi. Xususan, shaxsiy tarzda bog‘lanib, “VIP fan-uchrashuvi” bahonasida pul so‘rash ham mumkin emasligi ta’kidlangan.
Agentlik muxlislardan shubhali akkauntlardan kelgan xabarlarga javob bermaslikni va bunday holatlar haqida kompaniyaga xabar berishni so‘ragan. Shuningdek, soxta akkauntlarni monitoring qilish kuchaytirilishini bildirgan.
Bu voqea mashhur insonlarning nomi va suratlaridan foydalanib, ijtimoiy tarmoqlarda ishonch qozonishga urinadigan firibgarlar usulini yana bir bor ko‘rsatdi. Ayniqsa, munosabatlarni tezda romantik bosqichga olib borish, real uchrashuv yoki telefon qo‘ng‘iroqlaridan qochish va keyinchalik pul talab qilish bunday sxemalarning asosiy belgilaridan hisoblanadi.
