Aktyor va bloger Bobur Mansurov “O‘zbekiston Respublikasi Madaniyat va san’at xodimlari kuni” munosabati bilan “Madaniyat va san’at fidokori” ko‘krak nishoni bilan taqdirlandi.
Mazkur mukofot ijtimoiy tarmoqlarda turli bahs-munozaralarga sabab bo‘ldi. Ayrim foydalanuvchilar mukofotning adolatliligi yuzasidan savollar ko‘targan bo‘lsa, Mansurov bu tanqidlarga javob qaytardi.
Uning ta’kidlashicha, mukofot nohaq berilgani haqidagi fikrlar bilan u rozi emas. “Hammaga birdek yoqishning iloji yo‘q, ijod ham har kim tomonidan turlicha qabul qilinadi”, — deya izoh berdi u.
Mansurov 12 yildan buyon san’at sohasida faoliyat yuritib kelayotganini, shu vaqt davomida seriallar, spektakllar va turli tadbirlarda, hatto ba’zan haq to‘lanmasdan ham ishlaganini qayd etdi.
Shuningdek, u davlat tadbirlari va ijtimoiy loyihalarda ishtirok etganini, bu esa uning mehnati e’tirof etilganini ko‘rsatishini aytdi.
Aktyorning fikricha, ijodkorlarni doimiy tanqid qilish emas, balki ularni qo‘llab-quvvatlash muhim. Aks holda, bu sohaning rivojlanishiga salbiy ta’sir ko‘rsatishi mumkin.
