Janubiy Koreyaning mashhur BTS guruhi 2027-yilda bo‘lib o‘tadigan 69-Gremmi mukofotiga o‘z qo‘shiqlarini nomzod sifatida taqdim etmasligini ma’lum qildi. Guruh bu qarorni “Eng yaxshi Osiyo pop musiqasi ijrosi” nominatsiyasi joriy etilganiga norozilik sifatida izohladi.
BTS a’zolari qo‘shma bayonotida musiqa mintaqa yoki til bo‘yicha ajratilmasligi kerakligini ta’kidladi. Ularning fikricha, san’at asarlari qaysi davlat yoki tilda yaratilganidan qat’i nazar, bir xil mezonlar asosida baholanishi lozim. Shu sababli guruh bu yil o‘z albomi va qo‘shiqlarini Grammy mukofoti uchun taqdim etmaslikka qaror qilgan.
Mazkur qaror Recording Academy tomonidan yangi “Eng yaxshi Osiyo pop musiqasi ijrosi” nominatsiyasi e’lon qilinganidan so‘ng qabul qilindi. Akademiya bu yo‘l bilan K-pop, J-pop, C-pop va boshqa Osiyo pop musiqasi vakillarini kengroq e’tirof etishni maqsad qilganini bildirgan. Biroq BTS va ko‘plab muxlislar bunday yondashuv musiqani mintaqalar bo‘yicha ajratishini ta’kidlamoqda.
Bu BTS tarixida Grammy mukofotini ilk bor boykot qilishi bo‘ldi. Guruh avval bir necha bor nufuzli mukofotga nomzod bo‘lgan, biroq hali biror marta g‘olib chiqmagan. Shunga qaramay, BTS vakillari kelajakda ham ularning ijodi hech qanday geografik yoki til chegaralarisiz baholanishiga umid qilishlarini bildirdi.
