Futbol yulduzi Krishtianu Ronaldu va uning turmush o‘rtog‘i bo‘lishi kutilayotgan model Jorjina Rodrigesning to‘yi yana jahon OAV e’tiborida. Xorijiy nashrlar xabariga ko‘ra, juftlikning tantanali marosimi uchun ajratilayotgan byudjet 12 million AQSH dollariga baholanmoqda.
Ma’lumotlarga ko‘ra, marosim Portugaliyada o‘tkazilishi rejalashtirilgan. To‘yga sport, shou-biznes va biznes olamining ko‘plab mashhur vakillari taklif etilishi kutilmoqda. Shuningdek, mehmonlar uchun yuqori darajadagi xavfsizlik choralari va eksklyuziv dastur tayyorlanayotgani aytilmoqda.
Biroq so‘nggi kunlarda ijtimoiy tarmoqlarda tarqalgan ayrim xabarlar, jumladan to‘yning aniq sanasi yoki yaqin kunlarda bo‘lib o‘tishi haqidagi da’volar hozircha rasman tasdiqlanmagan. Bir qator ishonchli manbalar bu mish-mishlarni rad etib, marosim sanasi hali e’lon qilinmaganini ma’lum qilgan.
Krishtianu Ronaldu va Jorjina Rodriges 2016-yildan beri birga. Juftlik 2025-yilda unashtirilganini rasman e’lon qilgan va shundan buyon ularning to‘yi haqidagi xabarlar muntazam ravishda jahon OAV diqqat markazida bo‘lib kelmoqda.
