Marvel yulduzi Kris Evans uzoq yillar davomida Kapitan Amerika (Steve Rogers) obraziga qaytish bo‘yicha o‘ndan ortiq taklifni rad etganini ma’lum qildi. Aktyorning aytishicha, u “Qasoskorlar: Intiho” (Avengers: Endgame) filmidan keyin qahramonning hikoyasi mantiqiy yakunlangan deb hisoblagan va shu sababli yangi loyihalarga rozi bo‘lmagan.
Evansning so‘zlariga ko‘ra, Marvel Studios unga turli g‘oyalarni, jumladan komikslardagi Nomad obrazi bilan bog‘liq alohida film konsepsiyasini ham taklif qilgan. Biroq ularning hech biri aktyorga Steve Rogers hikoyasining munosib davomi bo‘lib tuyulmagan.
Aktyor faqat “Qasoskorlar: Qiyomat kuni” (Avengers: Doomsday) filmi ssenariysi bilan tanishganidan so‘ng fikrini o‘zgartirgan. Evansning ta’kidlashicha, rejissyorlar Jo va Entoni Russoning g‘oyasi hamda Robert Dauni kichikning Marvel olamiga qaytishi bu safar taklifni qabul qilishiga asosiy sabab bo‘lgan.
Kris Evansning qaytishi Marvel muxlislari orasida katta qiziqish uyg‘otdi. Aktyor esa kelajakda ham Kapitan Amerika rolini faqat qahramon tarixiga munosib va mazmunli hikoya bo‘lsagina yana ijro etishga tayyorligini bildirib o‘tdi.
