Apple 2027-yilda iPhone’ning 20 yilligiga bag‘ishlangan mutlaqo yangi avlod smartfonini taqdim etishi kutilmoqda. Norasmiy ma’lumotlarga ko‘ra, iPhone 20 kompaniya tarixidagi eng keskin dizayn o‘zgarishiga ega model bo‘lishi mumkin.
Insayderlarning xabar berishicha, yangi qurilma deyarli to‘liq shishadan ishlangan korpus, to‘rt tomondan egilgan ekran va maksimal darajada ingichka ramkalar bilan jihozlanadi. Shuningdek, Apple Face ID tizimi hamda old kamerani ekran ostiga joylashtirish ustida ishlayotgani aytilmoqda. Agar bu ma’lumotlar tasdiqlansa, iPhone 20 displeyida hech qanday kesma yoki Dynamic Island bo‘lmaydi.
Yana bir muhim yangilik sifatida 200 megapikselli asosiy kamera, jismoniy tugmalar o‘rnini bosuvchi sensorli boshqaruv elementlari, vibratsiya orqali ishlovchi yangi audio tizimi va kremniy-uglerod (silicon-carbon) batareyasi tilga olinmoqda. Bu texnologiyalar smartfonning ishlash muddati va suvga chidamliligini sezilarli darajada yaxshilashi mumkin.
Hozircha Apple iPhone 20 haqida rasmiy ma’lumot bermagan. Biroq tahlilchilar ushbu model kompaniyaning 20 yillik yubileyiga bag‘ishlangan eng muhim mahsulotlardan biri bo‘lishini, u nafaqat dizayn, balki funksional imkoniyatlari bilan ham iPhone tarixida yangi bosqichni boshlab berishini taxmin qilmoqda. Qurilmaning taqdimoti 2027-yil sentyabr oyida bo‘lib o‘tishi kutilmoqda.
