Pixarning mashhur “Koko” multfilmi muxlislari uzoq kutilgan davom filmiga yana bir qadam yaqinlashdi. Kompaniya “Koko 2” (Coco 2) multfilmi 2029-yil noyabr oyida kinoteatrlarda namoyish etilishini rasman ma’lum qildi.
Yangi film haqidagi ma’lumotlar 2026-yil avgustida Kaliforniyada bo‘lib o‘tgan D23 tadbirida e’lon qilindi. Pixar rahbari Pit Dokter tomoshabinlarga filmning yangi konsept-artini namoyish etdi. Unda birinchi filmda 12 yoshli bola sifatida ko‘rsatilgan Migel endi o‘smir yigit sifatida tasvirlangan.
“Koko 2” voqealari birinchi qismdan bir necha yil o‘tib sodir bo‘ladi. Pixar’ning rasmiy ma’lumotlariga ko‘ra, Migel Santa Sesiliya ko‘chalarida musiqa ijro etib, muhim tinglovga tayyorgarlik ko‘rayotgan paytda uning hayotini o‘zgartiradigan voqea yuz beradi.
Syujetda birinchi filmning asosiy yovuz qahramoni Ernesto de la Kruz ham qaytadi. U o‘zining mag‘lubiyatiga qaramay, yana Migelning hayotiga aralashadi. Natijada Migel yana Marhumlar mamlakatiga borishga majbur bo‘ladi.
“Koko 2” ustida birinchi filmning ijodiy jamoasi ham ishlamoqda. Rejissyor Li Unkrich va hamrejissyor Adrian Molina loyihaga qaytadi. Filmni “Toy Story 4” va “Inside Out 2” filmlarida prodyuser sifatida ishlagan Mark Nielsen ishlab chiqaradi.
Birinchi “Koko” 2017-yilda chiqqan va katta muvaffaqiyatga erishgan. Multfilm “Eng yaxshi animatsion film” va “Eng yaxshi original qo‘shiq” nominatsiyalarida ikkita “Oskar” mukofotini qo‘lga kiritgan. “Remember Me” qo‘shig‘i ham filmning eng mashhur qismlaridan biriga aylangan.
Endi muxlislarni yangi savol qiziqtirmoqda: Migel o‘smirlik davrida qanday o‘zgaradi va Ernesto de la Kruzning qaytishi uning hayotiga qanday ta’sir qiladi? Hozircha Pixar syujetning barcha tafsilotlarini oshkor qilmagan.
“Koko 2” 2029-yil noyabrida faqat kinoteatrlarda namoyish etiladi.
